സ്വാതന്ത്ര്യം ഒരു പ്രതിമ മാത്രമായ അമേരിക്ക എന്നത് നിക്കറോര് പാര്റയുടെയോ മറ്റോ ഒരു കവിതയാണെന്നു തോന്നന്നു. പാര്റയുടെയല്ലെങ്കില് മറ്റാരുടെയെങ്കിലും കവിതയായിരിക്കും. അഥവാ, കവിതയല്ലെങ്കില്ത്തന്നെ സ്വാതന്ത്ര്യം ഒരു പ്രതിമയാണമേരിക്കയില് എന്ന കാര്യത്തില് തര്ക്കമേതുമില്ല. കാരണം, ആ പേരില് അവിടെയൊരു പ്രതിമയുണ്ട്. അല്ലാതെ മറ്റൊന്നുമില്ലതാനും.
ഇന്ത്യയില് പ്രതിമകള്ക്കു പഞ്ഞമൊന്നുമില്ല. പണ്ടൊരു കവലപ്പത്രവായനക്കാരന് പ്രതി മകളുമൊത്തു കഴിയുകയായിരുന്നു എന്നു വായിച്ചു ഞെട്ടിയ കഥ ഇന്നും പ്രസക്തം. എക്കാലവും ഇന്ത്യയില് പ്രതികളും പ്രതിമകളുമുണ്ടായിരുന്നു. രാഷ്ട്രപിതാവ് മഹാത്മാഗാന്ധിമുതല് കാളവണ്ടിയില് വണ്ടിയിടിച്ചുവടിയായ പിടി ചാക്കോ വരെ ഇവിടെ പ്രതിമകളാണ്. കോട്ടയം നഗരത്തില് ഈ രണ്ടു പ്രതിമകളുമുണ്ടുതാനും. ഇവയെപ്പറ്റിയാണ് പണ്ടൊരു ഫലിതമുണ്ടായിട്ടുള്ളത്. കോട്ടയത്ത് സന്ധ്യയായിക്കഴിഞ്ഞാല് വെള്ളമടിക്കാത്ത രണ്ടേ രണ്ടുപേരേ ഉണ്ടാകൂ. ഒന്ന്, ഗാന്ധിസ്ക്വയറിലെ ഗാന്ധിയും രണ്ടാമന് ശാസ്ത്രിറോഡിലെ പി.ടി. ചാക്കോയും. ഇപ്പോള് കുര്യന് ഉതുപ്പു റോഡിലെ പാര്ക്കിലെ ഹെര്മന് ഗുണ്ടര്ട്ടും വെള്ളമടി നിര്ത്തിയവനായി നിവര്ന്നുനില്ക്കുന്നുണ്ടു് ഈ മഹാനഗരത്തില്.
അല്ലാതെയും പ്രതിമകള് എന്നും പ്രശ്നമുണ്ടാക്കിയിട്ടുണ്ട് ഈ മലയാളക്കരയില്. പെണ്ണുങ്ങളെ മാത്രം പ്രതിമയാക്കുന്നു, അതും പരിപൂര്ണനഗ്നമായിട്ടുമാത്രം പ്രതിമകളാക്കുന്ന കാനായി കുഞ്ഞിരാമനാണ് ഈ ലഹളക്കിരയായവരില് പ്രമുഖന്. മലമ്പുഴയിലെ യക്ഷി മുതല് വേളിയിലെ ശംഖുവരെ നഗ്നതയുടെ പേരില് നാണംകെട്ടിട്ടുണ്ട്. അതിനുപുറമേ, ഏതോ ഒരു ഓഫീസിലോ യൂണിവേഴ്സിറ്റിയിലോ മറ്റോ നഗ്നമായ പുല്രൂപങ്ങള് കേരളക്കരയുടെ സദാചാരത്തെയാകെ ചാരമാക്കിമാറ്റിയിട്ടുമുണ്ട്.
ഇനി ഇന്ത്യയുടെ കാര്യം നോക്കിയാലും സംഗതി അത്ര ശുഭകരമൊന്നുമല്ല. മായാവതിയുടെ ആനപ്രതിമകള് തൊട്ട്, ആനകളുടെ മായാവതിപ്രതിമകള് വരെ ഇവിടെ വിവാദമുണ്ടാക്കിയിട്ടുണ്ട്.
ഇപ്പോഴിതാ പുതിയൊരു പ്രതിമ ഇവിടെ, കേരളീയമായ പശ്ചാത്തലത്തില് വിവാദം കോരിയിടുകയാണ്.
മലയാളത്തിലെ ആദ്യത്തെ സിനിമാതാരദ്വയമായ സത്യന്റെയും പ്രേംനസീറിന്റെയും പ്രതിമകള് നിര്മിക്കാന് പത്തുവീതം ലക്ഷം രൂപ അനുവദിച്ചതായി കേരള സര്ക്കാര് ഒരു തീരുമാനമെടുത്തിരിക്കുന്നു. ആയവിവരം പൊതുജനത്തോട് ഉണര്ത്തിച്ചത് മറ്റൊരു പ്രതിമയായ സര്വശ്രീ ഉമ്മന്ചാണ്ടിയത്രേ!
ഇവിടെ വിവാദം ഹിന്ദുവായ സത്യന് പ്രതിമയെച്ചൊല്ലിയല്ല. പ്രത്യുത, മുസ്ലിം പ്രതിമയായ പ്രേം നസീറിനെച്ചൊല്ലിയാണ്. നസീര് ഒരു മുസ്ലിമായിരുന്നെന്നും ഇസ്ലാം മതവിശ്വാസിയായിരുന്ന അദ്ദേഹത്തിന്റെ പ്രതിമ നിര്മിക്കുന്നത് മതശാസനകള്ക്കു നിരക്കുന്നതല്ലെന്നുമാണ് ഇസ്ലാം ഫണ്ടമെന്റലിസ്റ്റുകളുടെ വാദം. കാക്കകള്ക്കു തൂറാന് ഒരു കക്കൂസായി നസീറിനെ പത്തുലക്ഷം രൂപ ചെലവില് നിര്മിക്കേണ്ട കാര്യമില്ലെന്നും അവര് പറയുന്നു. അതില് ഒരു ദുരുദ്ദേശ്യം ഉള്ളതു മറക്കരുത്. വേണമെങ്കില് കാക്കകള് സത്യന് പ്രതിമയില് തൂറിക്കോട്ടെ എന്ന്.
ഇവിടെ അപാരവിചിത്രമായൊരു പഴയകാല സംഭവം ഓര്മവരുന്നു. അത് ചങ്ങനാശ്ശേരി എന്എസ്എസ് കോളജില് സംഭവിച്ചതായി പറയപ്പെടുന്ന ഒരു കാവ്യസരണിയാണ്. ആ കോളജ് സമുദായാചാര്യന് മന്നത്ത് പത്മനാഭന് നേരിട്ടു പ്രതിമയായി നിലകൊണ്ട് നടത്തിക്കൊണ്ടുപോരുന്ന ഒരു കോളജാണെന്നറിയാമല്ലോ. അങ്ങനെയിരിക്കെ, ഒരുകാലത്ത്, ഒരു കല്പനാവിലസിതനായ മലയാളം അദ്ധ്യാപകന് പുറത്ത്, വെയില്കൊണ്ടുനില്ക്കുന്ന മന്നത്തിന്റെ പ്രതിമയെ നോക്കി നിമിഷകവിത ചൊല്ലിയത്രേ, അതും പ്രാസത്തില്, അലങ്കാരത്തില്, വൃത്തത്തില്, ചതുരതയോടെ.
വെളിയില് കുടതന് കീഴില്
നില്പൂ ഭാരതകേസരി....
അളിയന്റെ ശിരസ്സിന്മേല്
കിളിതൂറുന്നു നിത്യവും!
നില്പൂ ഭാരതകേസരി....
അളിയന്റെ ശിരസ്സിന്മേല്
കിളിതൂറുന്നു നിത്യവും!
കവിത അസാമാന്യമായിരുന്നെങ്കിലും ആളുടെ പണിതെറിച്ചെന്നാണ് കേള്വി. സത്യമോ മിഥ്യയോ എന്നത് ഇടമറുകു കുടുംബത്തില് ആരെടെങ്കിലും ചോദിക്കേണ്ടിവരും.
എന്തോ ആകട്ടെ. നമുക്കു വിഷയത്തിലേക്കു വരാം. പ്രേം നസീറിന്റെ പ്രതിമ വയ്ക്കാന് സമ്മതിക്കില്ല എന്നു പറയുന്നവര് അദ്ദേഹമഭിനയിച്ച സിനിമകളോടെന്തു പറയും എന്നതാണു വിചിത്രമായി തോന്നുന്നത്. സിനിമയില് മരിച്ചയാള് അനങ്ങുന്നു, സംസാരിക്കുന്നു, പ്രേമിക്കുന്നു. മേല്പ്പറഞ്ഞ പ്രേം നസീര് തന്നെ ഇന്നും ദിവസം എത്രയോ വട്ടമാണ് ഇനിയൊരു ജന്മം കൂടി... എന്നോ ചേട്ടന് കേഡീ അനിയനു പേടി എന്നോ ഒക്കെ പാടിക്കൊണ്ട് എത്തുന്നത്.
എന്തോ ആകട്ടെ. നമുക്കു വിഷയത്തിലേക്കു വരാം. പ്രേം നസീറിന്റെ പ്രതിമ വയ്ക്കാന് സമ്മതിക്കില്ല എന്നു പറയുന്നവര് അദ്ദേഹമഭിനയിച്ച സിനിമകളോടെന്തു പറയും എന്നതാണു വിചിത്രമായി തോന്നുന്നത്. സിനിമയില് മരിച്ചയാള് അനങ്ങുന്നു, സംസാരിക്കുന്നു, പ്രേമിക്കുന്നു. മേല്പ്പറഞ്ഞ പ്രേം നസീര് തന്നെ ഇന്നും ദിവസം എത്രയോ വട്ടമാണ് ഇനിയൊരു ജന്മം കൂടി... എന്നോ ചേട്ടന് കേഡീ അനിയനു പേടി എന്നോ ഒക്കെ പാടിക്കൊണ്ട് എത്തുന്നത്.
സത്യം പറഞ്ഞാല് സിനിമയില് മൃതദേഹത്തിനുപോലും അനങ്ങാമെന്നാണു മഹാനായ ഗൊദാദു പറഞ്ഞിരിക്കുന്നത്. പ്രതിമ കുറഞ്ഞ പക്ഷം മിണ്ടുകയോ അനങ്ങുകയോ എങ്കിലും ചെയ്യുന്നില്ല. എന്നിരിക്കെ, പ്രേംനസീറിനെ ഒരു പ്രതിമയാക്കിയെന്നതുകൊണ്ട് എന്തു മതപരദോഷം വരാനാണ്. ഇനി ശരിക്കും മതം നോക്കുകയാണെങ്കില് സിനിമ ഹറാമാണോ ഹലാലാണോ എന്ന കോയീം അയ്ന്റെ മുഡ്ഗേം എന്നതിനു തുല്യമായ ആഗോളപ്രശ്നം ഉയര്ന്നുവരികയും ചെയ്യും.
നസീറിന്റെ ഒരു പ്രതിമ. അതു സത്യത്തില് ആരെ കടിക്കാനാണ്. പ്രതിമ വേണോ വേണ്ടയോ അതില് കിളിതൂറുമോ നിത്യവും എന്നതെല്ലാം വേറേ പ്രശ്നം. പക്ഷേ ഒരു പ്രതിമക്കാര്യത്തില് ഇത്രമേല് പ്രതിപക്ഷബഹുമാനമില്ലായ്മ അത്രമേല് ആശാസ്യമോ?
മറ്റൊന്ന് പ്രതിമയ്ക്കു പകരം നസീറിന്റെ ഒരു മുടിയിഴയെങ്ങാനും കിട്ടിയാല് അതു വച്ചാരാധിക്കുന്നതിന് വല്ല വിലക്കും ഉള്ളതായിരിക്കുമോ എന്ന സംശയമാണ്. അല്ലാ, അതു സുന്നത്തായി ഭവിക്കുമെങ്കില് സത്യന്റെ പ്രതിമയും നസീറിന്റെ കേശസ്മാരകവും ആയിക്കൊള്ളട്ടെ നമ്മുടെ അജന്ഡ.
നബിയുടെ കാര്ട്ടൂണുമായി ബന്ധപ്പെട്ട പ്രശ്നത്തിനു മുന്പ്, വളരെ വര്ഷങ്ങള്ക്കപ്പുറം മെസേജ് എന്ന സിനിമയില് നബിയെ കാണിക്കാന് ശ്രമം നടന്നിരുന്നു. ഒടുവില്, അതു പാടില്ലെന്ന മുസ്ലിം സംഘടനകളുടെ വിലക്കു കാരണം, നബിയെ കാണിക്കാതെയാണ് ആ സിനിമ പൂര്ത്തിയാക്കിയത്. അതില് സലിം (റ) (ഇനി റ ഇല്ലാത്തതിന്റെ പേരില് ആരും വഴക്കിനു വരണ്ട) ആയി അഭിനയിച്ചത് ആന്തണി ക്വിന്നാണ്. നബിയെ കാണിക്കുന്ന ഇടത്തെല്ലാം, നബിസഞ്ചരിക്കുന്ന ഒട്ടകത്തെയായിരുന്നു കാണിച്ചിരുന്നത്. അതിന്റെ നിഴലും മറ്റും. അതിരിക്കുന്നതും മറ്റും. അതൊരു തമാശയായി തോന്നിയിരുന്നു അന്ന് ആ സിനിമ കാണുമ്പോള്. നബിയുടെ പ്രതീകമായി ഒട്ടകം മാറുമ്പോള് അത് സത്യത്തില് നബിയുടെ ഒരു പ്രതീകമായി മാറുകയാണല്ലോ. പ്രതീകം തന്നെ ഈ പ്രതിമ. അപ്പോള്?...
പ്രതിമയുമായ് ബന്ധപ്പെട്ട ഒരു തമാശ കൂടി പറഞ്ഞുകൊണ്ട് ഉപസംഹരിക്കാം. (ബാക്കിയുള്ളവര് സംഹരിക്കട്ടെ)
ഫ്രാന്സിലെ ആ മഹാനഗരത്തിലെ പാര്ക്കില് നെപ്പോളിയന് കുതിരമേല് ഇരിക്കുന്ന ഒരു പ്രതിമയുണ്ടായിരുന്നു. അതില് കൊച്ചുമകനു തോന്നുന്ന കൌതുകം കണ്ടിട്ട് മുത്തച്ഛന്, അതാരെന്ന അവന്റെ ആകാംക്ഷയ്ക്കു മറുപടിയായി നെപ്പോളിയനെപ്പറ്റി വിശദീകരിച്ചുകൊടുത്തു. എന്നും പാര്ക്കില്പോകാനും നെപ്പോളിയനെ കാണാനും കുട്ടി താല്പര്യം കാട്ടി. മുത്തച്ഛന് എന്നും നെപ്പോളിയനെപ്പറ്റി വിശദമായി പറഞ്ഞുകൊടുക്കുകയും അവന്റെ ചരിത്രതാല്പര്യത്തില് സന്തുഷ്ടനാകുകയും ചെയ്തു. അവസാനം അവരുടെ കുടുംബത്തിന് നഗരം വിട്ടു മറ്റൊരിടത്തേക്കു പോകേണ്ട ആവശ്യം വന്നു. മുത്തച്ഛന് കുട്ടിയുമായി പാര്ക്കില് നെപ്പോളിനരികില് ചെന്നിട്ട് കുട്ടിയോടു പറഞ്ഞു, മോനേ, നെപ്പോളിയനോടു വിടപറയൂ... കുട്ടി വിടയോതി. മുത്തച്ഛന് ചോദിച്ചു. ഇനി നിനക്ക് നെപ്പോളിയനെപ്പറ്റി എന്തെങ്കിലും കൂടി അറിയാനുണ്ടോ?
കുട്ടി ചോദിച്ചു, മുത്തച്ഛാ, എനിക്കിനി ഒന്നുകൂടിയേ അറിയേണ്ടതുള്ളൂ... നമ്മുടെ നെപ്പോളിയന്റെ പുറത്തുകയറി വാളും പിടിച്ചിരിക്കുന്ന ആ മുണ്ടന് ആരാണ്?...
ഇനി പാര്റയ്ക്കൊരു പാരഡി കൂടി.
മതേതരത്വം
ഒരു
പ്രതിമ
മാത്രമായ
ഇന്ത്യ
-malayal.am
No comments:
Post a Comment