സാങ്കേതികലോകം 2011: ഒരു തിരിഞ്ഞു നോട്ടം
പോയ വര്ഷം എല്ലാ മേഖലയിലെയും പോലെ സാങ്കേതികലോകത്തും മാറ്റങ്ങളുടെയും പുതിയ തരംഗങ്ങളുടെയും വര്ഷം ആയിരുന്നു. ഇന്ത്യന് സാങ്കേതികലോകത്ത് 2011ല് എന്തെല്ലാം പ്രധാന കാര്യങ്ങള് നടന്നു എന്നു നോക്കാം. ഐപാഡ്, സ്മാര്ട്ട്ഫോണുകളുടെ പ്രളയം, ഐഫോണ്, ആന്ഡ്രോയിഡ് വിപ്ലവത്തില് അടി പതറിയ നോക്കിയയും ബ്ലാക്ക്ബെറിയും. അങ്ങനെ സംഭവബഹുലം തന്നെയായിരുന്നു 2011ലെ സാങ്കേതിക ലോകം എന്നു കാണാം.പുതുവര്ഷത്തില് ഗാഡ്ജറ്റ് ലോകം എന്തൊക്കെ വിസ്മയങ്ങളായിരിക്കും ലോകത്തിനു വേണ്ടി കാത്തു വെച്ചിരിക്കുക. 2011ല് നിന്നും വിഭിന്നമായി എന്തൊക്കെ നമുക്ക് 2012ല് പ്രതീക്ഷിക്കാം. ശാസ്ത്രത്തിന്റെ പോക്ക് എന്നും താഴെ നിന്നും മുകളിലേക്ക് മാത്രമായതിനാല് തീര്ച്ചയായും അല്ഭുതങ്ങള് പ്രതീക്ഷിക്കാം.
ഫെയ്സ്ബുക്ക്, ട്വിറ്റര് തുടങ്ങിയ സോഷ്യല് നെറ്റ് വര്ക്കിംഗ് സൈറ്റുകള് ഇന്ത്യന് ജീവിതത്തില് വളരെയേറെ സ്വാധീനം ചെലുത്തിയ വര്ഷമാണ് വിട പറഞ്ഞിരിക്കുന്നത്. സോഷ്യല് നെറ്റ് വര്ക്കിംഗ് സൈറ്റുകളുടെ മേല് നിയന്ത്രണം ചെലുത്താന് ഗവണ്മെന്റ് ശ്രമങ്ങള് തുടങ്ങുന്നതു വരെയെത്തി ഈ സ്വാധീനത്തിന്റെ പോക്ക്.
സ്മാര്ട്ട്ഫോണുകളുടെ ഒരു കുത്തൊഴുക്കു തന്നെയുണ്ടായി 2011ല്. പ്രത്യേകിച്ചും ആന്ഡ്രോയിഡ് സ്മാര്ട്ട്ഫോണുകള്. ആന്ഡ്രോയിഡ് ഗാഡ്ജറ്റുകള് അരങ്ങു വാണപ്പോള് അടി പതറിയത് മൊബൈല് ഫോണ് വിപണിയലെ മുടിചൂടാ മന്നന്മാരായിരുന്ന നോക്കിയക്കും റിം ബ്ലാക്ക്ബെറിക്കും ആണ്.
വില കൂടിയ ഐഫോണ് പോലുള്ള ഗാഡ്ജറ്റുകള്ക്ക് വലിയ പ്രസക്തിയില്ലാത്ത ഇന്ത്യയില് ആന്ഡ്രോയിഡ് ഹാന്ഡ്സെറ്റുകളുടെ ഉത്സവക്കാലമായിരുന്നു പോയ വര്ഷം. ലോകത്താകമാനവും ഈ ഒരു തരംഗം തന്നെയായിരുന്നു. 200 ദശലകഷത്തോളം സ്മാര്ട്ട്ഫോണുകളാണ് ഉപയോഗിച്ചു കൊണ്ടിരിക്കുന്നത്. ഇത് കഴിഞ്ഞ നവംബര് വരെയുള്ള കണക്കാണ്. ദിനേന 700,000 പുതിയ സ്മാര്ട്ട്ഫോണുകളാണ് ആക്റ്റിവേറ്റ് ചെയ്തുകൊണ്ടിരിക്കുന്നത്!
നോക്കിയയ്ക്ക് മുമ്പുണ്ടായിരുന്ന മേല്ക്കോയ്മ ഇപ്പോഴും നഷ്ടപ്പെട്ടു എന്നു പറയാറായിട്ടില്ല എങ്കിലും സ്മാര്ട്ട്ഫോണ് വിപണിയില് നോക്കിയ പിറകില് തന്നെയാണ്.
അതുപോലെ 3ജി നെറ്റ് വര്ക്കിന്റെ ഒരു തരംഗം തന്നെയായിരുന്നു 2011. ഇന്ത്യന് വിപണിയും ഇക്കാര്യത്തില് ഒട്ടും പിറകിലായിരുന്നില്ല. 2011 അവസാനത്തോടെ 3ജി പതുക്കെ 4ജിയ്ക്ക് വഴിമാറി കൊടുക്കുന്നതിന്റെ ലക്ഷണങ്ങള് കണ്ടു തുടങ്ങിയിരിക്കുന്നു. പല പ്രമുഖ നിര്മ്മാണ കമ്പനികളുടെയും അണിയറയില് 4ജി എല്ടിഇ നെറ്റ് വര്ക്കുകളുള്ള ഹാന്ഡ്സെറ്റുകളുടെ നിര്മ്മാണ പ്രവര്ത്തനങ്ങള് തകൃതിയായി നടക്കുന്നു. ഇവയില് ചില ഫോണുകളെ കുരിച്ചെങ്കിലും പല ഊഹാപോഹങ്ങളും പരക്കുന്നുമുണ്ട്.
ഇന്ത്യന് സാങ്കേതികലോകത്തെ വലിയ തോതില് സ്വാധീനിച്ച കാര്യങ്ങളില് ഒന്നാണ് മൊബൈല് നമ്പര് പോര്ട്ടബിലിറ്റി. ഇതു നെറ്റ് വര്ക്കിംഗ് മേഖലയില് വലിയ മാറ്റങ്ങള്ക്ക് വഴി വെച്ചു. ഓരോ കമ്പനിയും താന്താങ്ങളുടെ ഉപഭോക്താക്കളെ നിലനിര്ത്താനും കൂടുതല് ഉപയോക്താക്കളെ നേടാനും പുതിയ ഓഫറുകള് നല്കുന്നതില് പരസ്പരം മത്സരിച്ചപ്പോള്, ഈ കലക്കവെള്ളത്തില് മീന് പിടിച്ചത് ഉപഭോക്താക്കളാണ്.
ആധാര് അഥവാ യുനീക്ക് ഐഡന്റിറ്റി ഇന്ത്യയിലൊട്ടാകെ നടപ്പിലാക്കാന്ആരംഭിച്ചതും 2011ലാണ്. ഇതുവഴി ഏതൊരു ഇന്ത്യന് പൗരനെ കുറിച്ചും അയാളുടെ ആധാര് നമ്പര് ഉപയോഗിച്ച് അറിയാന് സാധിക്കും. ഇതു അപകടം വിളിച്ചു വരുത്തും, സ്വകാര്യത ഇല്ലാതാക്കും എന്നിങ്ങനെയുള്ള എതിര്പ്പുകള്ക്കു നടുവിലും നടപടി ക്രമങ്ങള് മുന്നോട്ടു പോയിക്കൊണ്ടിരിക്കുന്നു.
നെറ്റ്ബുക്ക് കമ്പ്യൂട്ടറുകള് ടാബ്ലറ്റ് കമ്പ്യൂട്ടറുകള്ക്ക് വഴിമാറി കൊടുത്തതും 2011ലായിരുന്നു. ഏതു തിരഞ്ഞെടുക്കും എന്നു ഉപഭോക്താക്കള്ക്ക് ആശങ്കയുണ്ടാക്കും വിധം ഒന്നിനൊന്ന് മെച്ചത്തിലുള്ള ടാബ്ലറ്റുകള് വിപണിയില് മത്സരം തുടരുന്നു.
റ്റാറ്റ നാനോയ്ക്ക് ശേഷം ഇന്ത്യ ലോകത്തിനെ വിസ്മയിപ്പിച്ച ആകാശ് ടാബ്ലറ്റ് കമ്പ്യൂട്ടര് പുറത്തിറങ്ങിയതും 2011ലായിരുന്നു. വെറും 2,500 രൂപ മാത്രം വിലയുള്ള ഈ ഗാഡ്ജറ്റ് അവതരിപ്പിക്കുക വഴി ഇന്ത്യയിലെ സാധാരണക്കാരനെ വിവരസാങ്കേതികവിദ്യയോട് കൂടുതല് അടുപ്പിക്കുകയാണ് ലക്ഷ്യം. തിരഞ്ഞെടുത്ത വിദ്യാഭ്യാസ സ്ഥാപനങ്ങളിലെ വിദ്യാര്ത്ഥികള്ക്കിടയില് ഇവ സൗജന്യമായി വിതരണം ചെയ്യുകയും ചെയ്തു. ചുരുങ്ങിയ കാലം കൊണ്ട് ലക്ഷക്കണക്കിന് ആള്ക്കാരാണ് ആകാശ് ഓണ്ലൈന് ആയി ബുക്ക് ചെയ്തത്.
ശാസ്ത്രം എന്നും മുന്നോട്ടു മാത്രമേ സഞ്ചരിച്ചിട്ടുള്ളൂ. അതിനാല് 2011നെ അപേക്ഷിച്ച് സാങ്കേതിലോകത്ത് 2012ല് കൂടുതല് വിസ്മയങ്ങള് തീര്ച്ചയായും പ്രതീക്ഷിക്കാം. ആപ്പിളിന്റെ ഐടിവി പോലുള്ള നിരവധി ടെക് വിസ്മയങ്ങളെ കുറിച്ച് നമുക്ക് സൂചനകള് ലഭിച്ചു കഴിഞ്ഞു. എന്നാല്ഡ അതിലും കൂടുതല് വിസ്മയങ്ങള് 2012 നമുക്കായി കാത്തുവെച്ചിട്ടുണ്ടെന്നു തന്നെയുറപ്പിക്കാം.
2012ലെ ഗാഡ്ജറ്റുകളുടെ വിസ്മയലോകം
മടക്കാനും ഒടിക്കാനും കഴിയുന്ന ഡിസ്പ്ലേകളുള്ള സ്മാര്ട്ട്ഫോണുകള്, തീരെ കട്ടി കുറഞ്ഞ ലാപ്ടോപ്പുകള്, ദിവസം മുഴുവന് നീണ്ടു നില്ക്കുന്ന ബാറ്ററി ബാക്ക്അപ്പ്, ക്ലൗഡ് സേവനങ്ങള് കൂടുതല് മികച്ച രീതിയില് ഉപയോഗപ്പെടുത്തല് എന്നിങ്ങനെയൊക്കെയാണ് 2012ല് നിന്നും ഗാഡ്ജറ്റ് ലോകം പ്രതീക്ഷിക്കുന്നത്.
ഭാരം വളരെ കുറഞ്ഞ, കട്ടി തീരെ ഇല്ലാത്ത, ദിവസം മുഴുവന് നീണ്ടു നില്ക്കുന്ന ബാറ്ററി ബാക്ക്അപ്പ് ഉള്ള ഒരു ടാബ്ലറ്റ് ലഭിച്ചാല് എങ്ങനെയിരിക്കും. 2012ല് അങ്ങനെയുള്ള ഗാഡ്ജറ്റുകള് പുറത്തിറങ്ങാനിരിക്കുന്നു. എന്നാല് അവ ടാബ്ലറ്റ് കമ്പ്യൂട്ടറുകളായിരിക്കില്ല, മറിച്ച് അള്ട്രാബുക്ക് കമ്പ്യൂട്ടറുകളായിരിക്കും.
ഇന്റലിന്റെ കണക്കു കൂട്ടലില് 2012 അവസാനത്തോടെ ആകെ നോട്ട്ബുക്ക് മാര്ക്കറ്റിന്റെ 40 ശതമാനം അള്ട്രാബുക്കുകളുടെതായിരിക്കും. ഇതു സത്യമാണെങ്കില് 2011 മാത്രം ജനിച്ച ഈ പുതിയ ഗാഡ്ജറ്റ് വിഭാഗം 2012ന്റെ വിസ്മയങ്ങളില് ഒന്നായിരിക്കും.
ക്ലൗഡ് സേവനങ്ങള് കൂടുതല് വിപുലമായ രീതിയില് ഉപയോഗപ്പെടുത്തിയായിരിക്കും 2012ലെ മറ്റൊരു സാങ്കേതിക വിസ്മയം. ഉദാഹരണത്തിന് ബ്ലാക്ക്ബെറി പ്രൊട്ടെക്റ്റ് എടുക്കാം. ഈ സേവനം ഉപയോഗപ്പെടുത്തുകയാണെങ്കില് ബ്ലാക്ക്ബെറി ഗാഡ്ജറ്റ് നഷ്ടപ്പെടുകയോ മാറ്റുകയോ ചെയ്യുമ്പോള് നിലവിലുള്ള ബാക്ക്അപ്പ് നഷ്ടപ്പെടില്ല. ആകെ ചെയ്യേണ്ടത് ഇത്രമാത്രം നിങ്ങളുടെ ബ്ലാക്ക്ബെറി ഗാഡ്ജറ്റ് രജിസ്റ്റര് ചെയ്യുക മാത്രമാണ്.
പേഴ്സണല് ക്ലൗഡ് ഉബുണ്ടു ക്ലൗഡ് വണ് സേവനത്തിന്റെ കാര്യം അതിലും രസകരമാണ്. വീട്ടിലെ ഡെസ്ക്ടോപ്പ് കമ്പ്യൂട്ടറിലുള്ള പേഴ്സണല് ഫയലുകളും ഡാറ്റകളും ലോകത്തിന്റെ ഏതു ഭാഗത്തു നിന്നും ഇതുവഴി ഉപയോഗിക്കുകയും വേണമെങ്കില് എഡിറ്റ് ചെയ്യുകയും ചെയ്യാം.
ഔക്ടോബറില് ലോസ് ഏഞ്ചല്സില് നടന്ന മാക്സ് 2011 അവാര്ഡ്ദാന ചടങ്ങില് 2012 പകുതിയോടെ അഡോബിന്റെ ക്രിയേറ്റീവ് ക്ലൗഡ് സേവനം തത്സമയമാവും എന്നു പ്രഖ്യാപിക്കുകയുണ്ടായി. ഈ സേവനം വഴി കമ്പ്യൂട്ടറില് തുടങ്ങിയ ഒരു പ്രവര്ത്തനം പിന്നീട് ടാബ്ലറ്റിലോ മൊബൈല് ഹാന്ഡ്സെറ്റിലോ തുടരാന് സാധിക്കും.
2007ല് ആപ്പിള് ഐഫോണിന്റെ പിറവിയോടെ തുടങ്ങിയതാണ് സ്മാര്ട്ട്ഫോണ് തരംഗം. അത് അതിന്റെ പാരമ്യത്തില് ആയിരുന്നു 2011ല് എന്നു പറയാം. പ്രത്യേകിച്ചും ആന്ഡ്രോയിഡ് സ്മാര്ട്ട്ഫോണുകളുടെ. ഡ്യുവല്-കോര് പ്രോസസ്സറിന്റെ സപ്പോര്ട്ടോടെ പ്രവര്ത്തിക്കുന്നു ഐഫോണ് പുറത്തിറങ്ങിയതും 2011ലായിരുന്നു. ഐഫോണ് 4എസ്.
ഇതിനു പിന്നാലെ മറ്റു പ്രമുഖ ഹാന്ഡ്സെറ്റ് നിര്മ്മാണ കമ്പനികളും ഡ്യുവല്-കോര് പ്രോസസ്സറുള്ള സ്മാര്ട്ട്ഫോണുകളിറക്കി. സാംസംഗ് ഗാലക്സി എസ്II, എല്ജി ഒപ്റ്റിമസ് 2എക്സ്, എച്ച്ടിസി സെന്സേഷന് തുടങ്ങിയവ. ഈ വര്ഷം ഡ്യവല്-കോര് സ്മാര്ട്ട്ഫോണുകളുടെ വില കുറഞ്ഞ് സാധാരണക്കാരുടെ കൈപിടിയിലൊതുങ്ങും വിധമാകും എന്നു പ്രതീക്ഷിക്കാം.
ആദ്യ ക്വാഡ്-കോര് സ്മാര്ട്ട്ഫോണ് ആയ എച്ച്ടിസി എഡ്ജ് ഈ വര്ഷം പുറത്തിറങ്ങാനിരിക്കുകയാണ്. അതായത് 2011ല് രണ്ടു കോറായിരുന്നത് 2012ല് നാലു കോര്!
2010 ഐപാഡ് ഇറങ്ങിയപ്പോള് തുടങ്ങിയതാണ് ടാബാലറ്റ് കമ്പ്യൂട്ടര് തരംഗം. അതു മെല്ലെ അള്ട്രാബുക്കുകളുടെ വരവിന് വഴി വെച്ചുവെങ്കിലും ടാബ്ലറ്റ് തരംഗം അത്ര പെട്ടെന്നൊന്നും അവസാനിക്കും എന്നു തോന്നുന്നില്ല. പ്രതീക്ഷിക്കപ്പെടു പോലെ നാലു കോര് പ്രോസസ്സറുകളുടെ സപ്പോര്ട്ട് ഉള്ള ടാബ്ലറ്റ് കമ്പ്യൂട്ടറുകളുടെ വര്ഷമായിരിക്കും 2012. അവയ്ക്ക് എന്വിഡിയയുടെ ടെഗ്ര 3 ചിപിസെറ്റിന്റെ സപ്പോര്ട്ടും ഉണ്ടാകും.
2012ന്റെ രണ്ടാം പകുതിയോടെ റിലീസിനൊരുങ്ങിയിരിക്കുകയാണ് വിന്ഡോസ് 8 ടാബ്ലറ്റുകളും. ഡെല്, സാംസംഗ്, നോക്കിയ എന്നിവയില് നിന്നും ആണ് വിന്ഡോസ് 8 ടാബ്ലറ്റുകള് പ്രതീക്ഷിക്കുന്നത്. ആന്ഡ്രോയിഡ് പ്ലാറ്റ്ഫോമില് പ്രവര്ത്തിക്കുന്ന ടാബ്ലറ്റുകള്ക്കും ധാരാളം ആവശ്യക്കാരുണ്ടാകും 2012ലും എന്നാണ് പ്രതീക്ഷിക്കപ്പെടുന്നത്.
ഒരു മൊബൈല് ഹാന്ഡ്സെറ്റ് വാങ്ങുന്നതില് സ്വാധീനം ചെലുത്തുന്ന ഒരു പ്രധാന ഫീച്ചര് ആണ് അതിന്റെ ഡിസ്പ്ലേ വലിപ്പം. ഡിസ്പ്ലേയുടെ വലിപ്പത്തോടൊപ്പം, അതിന്റെ റെസൊലൂഷന്, സൂപ്പര് എഎംഒഎല്ഇഡി, ഗോറില്ല ഗ്ലാസ്, കപ്പാസിറ്റീവ് ടച്ച് സ്ക്രീന് എന്നിവയെല്ലാം ഒരാള് ഡിസ്പ്ലേയെ പറ്റി മാത്രം ഒരു ഫോണ് വാങ്ങുന്നതിനു മുമ്പ് ശ്രദ്ധിക്കും.
ഫ്ളെക്സിബിള് ഡിസ്പ്ലേയുള്ള ഫോണുകളാണ് 2012ല് പ്രതീക്ഷിക്കപ്പെടുന്ന ഗാഡ്ജറ്റ് വിസ്മയം. നോക്കിയയും സാംസംഗും ആയിരിക്കും ഫ്ളെക്സിബിള് ഡിസ്പ്ലേയുള്ള ഹാന്ഡ്സെറ്റുകള് പുറത്തിറക്കാനൊരുങ്ങുന്നവര്.
ഇവിടെയൊന്നും അവസാനിക്കില്ല സാങ്കേതിക വിസ്മയങ്ങള്. പ്രതീക്ഷിക്കുന്നതിനും എത്രയോ ഉയരത്തിലുള്ള വിസ്മയങ്ങള് നമുക്കായി 2012 കാത്തു വെച്ചിട്ടുണ്ട് എന്നുതന്നെ നമുക്ക് പ്രതീക്ഷിക്കാം.
No comments:
Post a Comment