ഗാന്ധിജി രാഷ്ട്ര പിതാവായതെന്തുകൊണ്ട്?

എപ്പോള്‍, എങ്ങിനെയാണ് ഗാന്ധിജി രാഷ്ട്ര പിതാവായത്. ചോദ്യം മറ്റാരോടുമല്ല. പ്രധാനമന്ത്രിയുടെ ഓഫീസിലേക്കാണ് വിവരാവകാശ നിയമപ്രകാരമുള്ള ഈ അന്വേഷണം പോയിരിക്കുന്നത്. ലഖ്നോവിലെ ഐശ്വര്യ പരാശര് എന്ന ആറാം ക്ളാസുകാരിയാണ് പ്രധാനമന്ത്രിയുടെ ഓഫീസിനെ ഒരു കൊച്ചു ചോദ്യത്തിലുടെ വട്ടം കറക്കിയത്.

മഹാത്മാ ഗാന്ധിക്ക് രാഷ്ട്ര പിതാവ് എന്ന ബഹുമതി സമ്മാനിച്ചതിന്റെ രേഖകളുടെ ഫോട്ടോ കോപ്പിയാണ് വിവരാവകാശ നിയമപ്രകാരം ഐശ്വര്യ ആവശ്യപ്പെട്ടത്. എന്നാല് ഇതിന് വ്യക്തമായ ഉത്തരം നല്കാന് അവര്ക്ക് സാധിച്ചില്ല. പ്രധാനമന്ത്രിയുടെ ഓഫീസിലിതുമായി ബന്ധപ്പെട്ട യാതൊരു രേഖകളും ഇല്ലെന്നും ഇതേക്കുറിച്ച് ആഭ്യന്തര മന്ത്രാലയത്തോടന്വേഷിക്കാനുമാണ് അവിടുന്ന് ഐശ്വര്യക്ക് കിട്ടിയ മറുപടി. എന്നാല് ആഭ്യന്തരമന്ത്രാലയം ചോദ്യം നാഷണല് ആര്ക്കൈവ്സിന് കൈമാറുകയാണുണ്ടായത്. ആര്ക്കൈവ്സിലും ഗാന്ധിജിയുടെ വിശേഷണവുമായി ബന്ധപ്പെട്ട ഒരു രേഖയും കണ്ടെത്താനായിട്ടില്ല.

സാമൂഹ്യ ശാസ്ത്രത്തില് ഗാന്ധിജിയെ കുറിച്ച് പഠിച്ചത് മുതല് എന്ത് കൊണ്ടായിരിക്കും ഗാന്ധിജിയെ രാഷ്ട്രപ്രിതാവെന്ന് വിളിക്കുന്നതെന്നായിരുന്നു ഐശ്വര്യയുടെ സംശയം. സംശയത്തിന് തൃപ്തികരമായ ഉത്തരമൊന്നും കിട്ടിയില്ലെങ്കിലും തന്റെ കത്ത് അവര് പരിഗണിച്ചതിന്റെ സന്തോഷത്തിലാണ് ഐശ്വര്യ.

വിവരാവകാശ പ്രവര്ത്തകയായ അമ്മയില് നിന്നാണ് ഐശ്വര്യ അതിന്റെ സാധ്യതകളെ കുറിച്ച് മനസ്സിലാക്കിയത്. ഇതിനു മുമ്പും വിവരാവകാശ നിയമത്തിന്റെ സാധ്യതകള് ഉപയോഗപ്പെടുത്തിയിട്ടുണ്ട് ഈ കൊച്ചു മിടുക്കി. തന്റെ സ്കൂളിനടുത്ത് മാലിന്യവുമായി ബന്ധപ്പെട്ടായിരുന്നു അത്.

1944 ജൂലൈ ആറിന് സിങ്കപ്പൂര് റേഡിയോയില് നടത്തിയ ഒരു പ്രസംഗത്തിനിടെ നേതാജി സുഭാഷ് ചന്ദ്രബോസാണ് ഗാന്ധിജിയെ ആദ്യമായി രാഷ്ട്രപിതാവെന്ന് വിശേഷിപ്പിക്കുന്നത്. പിന്നീട് 1947 ഏപ്രില് 28ന് ഒരു കോണ്ഫറന്സിടെ സരോജിനി നായിഡുവും ഗാന്ധിജിയെ രാഷട്രപിതാവെന്ന് പരാമര്ശിച്ചു.